Ta̍k-páiⁿ nā thak-tio̍h ūi mo͘-chi̍t-ūi hāu-iú ê pēⁿ-thiàⁿ tāi-tó ê siau-sit, chóng-sī kám-kak chin m̄-kam kap chū-chek: M̄-kam ê, sī in-ūi i kap choân-ke, soah hām-lo̍h tī put-an, tio̍h-kip, sīm-chì ui-kip ê kéng-hóng, seng-oa̍h kok-hong-bīn só͘ siū ê kái-piàn kap ap-le̍k;
Chū-chek ê, sī bē-tàng khah-chá chai-iáⁿ i ê pēⁿ-thiàⁿ, thang ki̍p-sî thê-kiong oân-cho͘ , hō͘ in thang lâi phiah-bián bô pit-iàu ê khó͘-thàng kap sún-hāi, sīm-chì sit-lo̍h sèⁿ-miā. Góa tī Má-chò͘ chò-peng ê sî (1974 nî) tī sū-koaⁿ-tūi siū-hùn, ka-tī bô sè-jī siak-poa̍h-tó, siong-tio̍h io-chiah-kut, thoa
kàu 1975 nî 2 goe̍h chiah tī Tâi-pak ê Sam-kun-chóng-īⁿ khui-to, tūi hit-sî sin-thé ê
chōng-hóng siū-tioh siong-tong ê éng-hióng, chú-iàu sī io-chiah-kut sng-thiàⁿ
bē chih-la̍t. Tùi góa ê gōa-piáu khòaⁿ-khí-lâi kap pêng-siông lâng bô siaⁿ
chha-pia̍t, tān-sī nā-beh àⁿ-io theh mi̍h-kiāⁿ, ah-sī khiā tiāⁿ-tiāⁿ saⁿ gō͘
hun-cheng, kiâⁿ chhiau-kòe cha̍p hun-cheng í-siōng ê lō͘, theh khah tāng ē
mi̍h-kiāⁿ, tùi góa lâi kóng sī ū khùn-lân.
Chhut-īⁿ kè-sio̍k tī kun-tiong ho̍k-ia̍h, 8
goe̍h chiah tùi kun-tiong thè-ngó͘, 9 goe̍h thak lán Tâi-lâm sîn-ha̍k-īⁿ
Sîn-ha̍k-hē it-nî-kip, chún-pī chiông-lâi hām lán ū-hūn tī Siōng-chú ê kok-tō͘
phah-piàⁿ, lēng-gōa iā ēng bē-chió sî-kan chhōe hong-hoat lâi kái-siān sin-thé
ê chōng-hóng, tāi-pō͘-hūn lóng-sī khì chhōe se-i, pau-koa: Kut-kho、Gōa-kho、Ho̍k-kiān-kho,
keng-kòe kúi-nî ê keng-giām, hoat-hiān chia̍h-ê i-seng só͘ khui ē io̍h-á, lóng
chha-put-to, pau-koa: chí-thiàⁿ, siau-iām, pàng-sang ki-jio̍k ê io̍h-á, ū
tâng-sî ke ūi-io̍h, koh in-ūi ū chia̍h chiah ū hāu, bô chia̍h tō bô hāu, ē
hoan-ló pìⁿ-chò i-lāi-sèng, kap hù-chok-iōng, só͘-í m̄-káⁿ sio͘ⁿ chia̍p chhōe
i-seng, chí-hó ēng khah-chē sî-kan hio̍h-khùn.
Kàu 1991 nî, khì chhōe Thian-hok sai (Tâi-lâm
Phok-ài kàu-hōe ê lāu chip-sū, i siàu-liân ê sî bat tī lán sîn-ha̍k-īⁿ tam-jīm
hāu-kang, gō͘-nî chêng kòe-sin ), i ê kang-hu chin-hó koh iu-thāi bo̍k-su, tān-sī
góa í-keng chhéng ha̍k-ká, siu-ji̍p iú-hān, tī chin su-iàu ê sî, chiah khì hō͘
i thui-ná, tah ko͘-io̍h, ū sî koh chia̍h io̍h-hún, lim pó͘-io̍h-chiú. Ta̍k-pái
sng-thiàⁿ kah lím-bē-tiâu chiah khì chhōe i tàu-kha-chhiú, lóng ài liân-sòa khì
saⁿ-chōa chiah hoe-ho̍k.
1995
nî, kap góa ê ha̍k-oân ê tiōng-hu se̍k-sāi, chai-iáⁿ i sī choan-chit ê kha-té-àn-mô͘-su,
chiū chiap-siū i-ê ho̍k-bū, kám-kak chin bô-siâng-khoán, tùi i-ê kài-siāu iā
jīn-bat i só͘-sio̍k ê thoân-thé—Kok-chè Jiok-sek Kiān-khong Gián-kiú-hōe(國際若石健康研究會), khai-sí góa chit 25 nî lâi Chū-jiân-liâu-hoat
ê ha̍k-si̍p. Pau-koa: Êng-ióng liâu-hoat, Lêng-liōng-chúi, Kha-té Àn-mô͘,
Seng-ki ím-sit, Keng-lo̍k Thui-ná, Un-lia̍t-liâu-hoat (To-pîn-phó͘
lêng-liōng-gî kap chhn̂g-pho͘ ) ...téng.
Hit-chūn iau tī Sîn-ha̍k-īⁿ ê sî, kāng-kî ê
tông-o̍h lóng-chai góa sin-thé ê chêng-hêng, iû-kî sī chá góa chi̍t kî ê
Pok-bûn-hiaⁿ, i hit-chūn thuh chi̍t-ki koáiⁿ-á. Góa chú-tōng khì hām i
se̍k-sāi, soat-bêng góa ê sin-thé chōng-hóng, chio i chò-hóe chò tē-pán ê
ūn-tōng, tong-sî góa iàu-bô o̍h siáⁿ-mih ki-khiáu, só͘-í bô-siáⁿ hāu-kó, m̄-ku
khiok tī í-āu tit-tio̍h i chin-chē ê chiàu-kò͘ kap iú-gî.
Sî-kan kòe-liáu
chin-kín, chū 1995 nî kàu-taⁿ í-keng 25 nî, góa ēng chin-chē sî-kan ha̍k-si̍p
sek-ha̍p góa kò-jîn ê pó-ióng hong-hoat, mā ēng lâi chiàu-kò͘ chhin-iú,
lúi-chek siong-tong ê keng-giām, hiah-ê phòe-ha̍p-tō͘ koân ê, hāu-kó lóng chin
bêng-hián, pau-koa in chhù-lāi ê lâng mā tit-tio̍h lī-ek kap pang-chō͘.
Kî-tiong chi̍t-ê khah tāi-piáu-sèng ê àn-lē chhiáⁿ chham-khó góa ê blog http://johnnyttwu.blogspot.com/2019/06/001.html sī
àn-lē ê tiah-iàu,
http://johnnyttwu.blogspot.com/2019/08/blog-post.html chit-ê bāng-ia̍h sī kai àn-lē ê siông-sè kì-lio̍k. Chhiáⁿ chham-khó chí-kàu.
Chòe-āu ài siaⁿ-bêng kúi-hāng: Tē-it. Góa m̄-sī i-seng mā m̄-sī Êng-ióng-su, he̍k-sī Io̍h-su, sī ha̍k-si̍p í-siōng kok-chióng kiān-khong-hoat, pau-koa tùi 1989 nî khai-sí ê Sim-lêng-tī-gū kap Hia̍p-tâm ê kò-pia̍t ho̍k-bū, koh tī 1995 nî kú-pān chit-ê gián-si̍p khò-thêng, pang-chō͘ lâi chham-ka ê hiaⁿ-ché hoe-ho̍k sim-lêng ê kiān-khong. Lán lóng chai-iáⁿ jio̍k-thé ê pēⁿ-thiàⁿ tāi-to-sò͘ sī in-ūi sim-lêng ê bô pêng-an, pau-koa: kín-tio͘ⁿ, hoan-ló, put-an, tio̍h-kip, hùn-nō͘, oàn-hīn, kòe-tō͘ ê chū-chek, tiōng-tōa ê ì-gōa....téng só͘ chō-sêng ê, koh mā ē éng-hióng kap lâng ê koan-hē, hu-hū sit-hô, chhin-chú koan-hē kín-tio͘ⁿ...téng, só͘-í tī hia̍p-tâm kòe-thêng tiong hō͘ lâi-tâm-chiá tit-tio̍h bô tiâu-kiāⁿ ê chiap-la̍p, pēng chiap-siū Sim-lêng-tī-gū ê kî-tó liáu-āu, i chiām-chiām hoe-ho̍k í-óng ê lí-tì kap seng-oa̍h lêng-le̍k, mā ē-tàng ha̍k-si̍p sin-ê ki-lêng kap chai-bat, tek-pia̍t sī kiān-khong-hoat.
Tē-jī.iú-koan ho̍k-bū ê
só͘-hùi, tû-liáu chi-hù só͘ ēng ê kàu-châi he̍k-sī êng-ióng-si̍t-phín ū
kong-khai ê kè-chîⁿ í-gōa, nā-sī bo̍k-chiá pún-lâng kap chhù-lāi ê lâng, chí-siu
pó-chèng-kim 2,500 kho͘ Tâi-phiò, chiàu iok-tēng ê lōe-iông oân-sêng, thang
choân-só͘ niá tńg-khì.
Tē-saⁿ lán ê sî-kan lóng
chin pó-kùi, só͘-í chhiáⁿ seng thak góa ê Blog, chiah ū-iok sî-kan.
Góa
tòa tī Tâi-lâm ê Kui-jîn khu, Lâm-teng-lō͘, 437 hāng, 5 hō.
Liân-lo̍k tiān-ōe: 0918 160 730 Hoan-gêng chí-kàu, sûn-mn̄g.
" Choân-jîn Ge̍k-choán Kiān-khong "（全人逆轉健康）Tùi kin-á-ji̍t khí, khai-sí chīn-liōng ēng Tâi-gú pe̍h-ōe Lô-má-jī lâi siá-chò, ha̍k-si̍p chiâⁿ-chò chin-chiàⁿ ê Tâi-oân-lâng, m̄-niā ē-hiáu thiaⁿ kap kóng Tâi-oân-ōe niâ, koh ē-hiáu thak kap siá, chhiáⁿ só͘-ū chū-chheng sī Tâi-oân-lâng ê chhin-iú chò-hóe lâi phah-piàⁿ chò chin-chiàⁿ ê Tâi-oân-kok ê jîn-bîn. Ēng chit-phiⁿ bûn-chio͘ⁿ lâi kì-liām chhit-cha̍p nî chêng seⁿ-ióng góa ê pē-bú, kap Tâi-oân chit-tè thó͘-tē, i-ki̍p Chhòng-chō-chú Siōng-tè. Siá tī nî móa chhit-cha̍p ê chi̍t-ji̍t chêng.從今天開始盡量用白話羅馬字書寫，學習成為真正的台灣人，不只會聽和說台語而已，更會讀和寫，還請自稱為台灣人的親友一起來努力做真正的台灣國的人民。 以這篇文章來紀念七十年前生養我的父母及台灣這塊土地，以及創造主上帝。 寫於年滿七十的前一天。
mā tah tī bīn-chheh siá chit-tōaⁿ chò kau-tài.
沒有留言:
張貼留言