Keng-choh Han-chû-hn̂g ê Lâng(耕番薯園的人) --Goân-tù-chiá Sū-Giân

Goân-tù-chiá Sū-Giân

Bô chhiáⁿ ha̍k-chiá、koân-ūi jîn-sū siá chhui-chiàn-bûn lâi phâng-tiô͘ⁿ, sī chit pún chheh lēng-gōa chi̍t-ê te̍k-sek, tī-chiā m̄-sī beh ǹg tho̍k-chiá bâi-oàn, á-sī ū kiû-thó khó-lîn ê ì-sù, kan-nā beh chiong Chió͘ⁿ-chha̍t-chi̍p-thoân, chóaⁿ-iō͘ⁿ chân-hāi lán Pún-thó͘ Tâi-oân-lâng ê chōe-hêng ê chin-siòng, ti̍t-chiap po̍k-lō͘ tī tho̍k-chiá ê bīn-chêng, lâi hoàn-chhéⁿ lán Tâi-oân-kok ê chú-lâng, kīn-kīn māi-hiòng kiàn-kok ê lō͘-siōng, iā thang lâi an-ùi í-keng kòe-óng ê To̍k-li̍p-kiàn-kok chì-sū, kap in ê āu-tāi, che sī góa sò͘-cha̍p-nî lâi ê sim-goān.

Chit pún chheh lāi-bīn ê chu-liāu, sī pún-lâng siū koaiⁿ tī Chió͘ⁿ-kài-sek cha̍t-thâu, i thàn Liân-ha̍p-kok Bêng-kun úi-jīm hō͘ i ū kong-chit sin-hūn ê ki-hōe, chhió͘ⁿ-toa̍t lán Tâi-oân só͘-ū ê mi̍h-kiāⁿ chò i ê châi-sán; siāng-sî, iā khì chin-chōe ê su-hêng-só͘ kap kaⁿ-lô. Tī góa chit jī-cha̍p-jī nî, chèng-tī-hoān seng-gâi ê sòe-goa̍t tiong, chhin-sin thé-giām、chhin-hīⁿ thiaⁿ-kè、chhin-ba̍k khòaⁿ-kè ê kì-lio̍k.

In-ūi Kò͘-sū ê chìn-hêng kòe-têng chin-kú、koh-chài bú-tâi chin-chia̍p kái-piàn、chiō͘ⁿ-tâi ê kak-sek iā chin-chōe、lāi-iông chin to-iō͘ⁿ téng-téng ê te̍k-sek, ka-siōng chok-chiá kian-siú thêng-hiān kò͘-sū goân-māu kap pek-chin ê goân-chek, ēng phok-sò͘ kap chū-jiân ê hong-sek lâi biâu-siá. Phí-jū-kóng：tī kak-sek ê tùi-ōe tiong chhut-hiān to-chiòng gú-giân, siāng chit ê jîn-bu̍t tī bô-kāng ê tiô͘ⁿ-ha̍p sú-iōng bô-siâng miâ-chheng …téng chêng-hêng, chiū-sī beh hoán-èng sî-kio̍k ê chin-bīn-māu. Siá chiah-chē bûn-jī koh sī ēng Tiong-bûn lâi hoat-piáu, tùi góa lâi kóng sī pòaⁿ-lō͘-chhut-ke ê hôe-siō͘ⁿ, m̄-bat kui-kí iā bô chiàu pō͘-só͘, tong-liân ē kā tho̍k-chiá cheng-ka chin-chē oh-tit liāu-kái ê chêng-hêng , tī chia ài chhiáⁿ chu-ūi to-to pau-hâm kap liōng-kái.

 

Koh-chài góa khai-sí gia̍h-pit beh siá-chok ê sî, lī-khui hia-ê tāi-chì iā í-keng sò͘ cha̍p nî kú, kò͘-sū hoat-seng ê tē-tiám kap sî-kan lân-bián ū chhut ji̍p, tān-sī lōe-iông lī-khui sū-si̍t bô hn̄g.

 

Lio̍k-lio̍k-sio̍k-sio̍k siá-chok keng-kòe kúi-nā nî, chóng-sǹg lâi kàu thang oe̍h-lo̍h thêng-chí hû-hō ê sùn-kan, chi̍t-sî chhèng-kàu sim-thâu-téng-- ê, m̄-sī hoaⁿ-hí, mā m̄-sī khin-sang, sī「Beh kàu tī-sî chiah ē-tàng ēng ka-kī ê bûn-jī lâi piáu-ta̍t ka-kī ê sim-su ?」Hôe-sióng tio̍h Ji̍t-jîn-sî-tāi tī tông-o̍h-kan ê oàn-thàn：「Si̍t-chāi sī chin m̄-goān ēng Ji̍t-bûn lâi siá-chok, m̄-ku koh ē-tàng án-chóaⁿ ?」Hit-sî-chūn oàn-chheh ê sim-chêng.

 

Siá kah lí-lí-lo-lo ē-tàng chhut-chheh, ài chin to-siā Lîm Sè-io̍k (林世煜)、Chô Khim-êng(曹欽榮)、Lí Cheng-siông(李禎祥) chu-kun、kap Tân Gio̍k-chu(陳玉珠) lāu-su、Tân Gî-kun(陳怡君) ko͘-niû、Khó͘ Hong-têng(許芳庭) ko͘-niû、iû-kî-sī Tēⁿ Sûn-gî(鄭純宜) ko͘-niû ê kū-thé、jia̍t-chêng koh chek-ke̍k ê hia̍p-chō͘ koh-khah tin-kùi.

Tī chia chin sīm-tiōng ǹg chu-ūi iu-siù ê hō͘-pòe、Tâi-oân-kiàn-kok un-tōng iú-le̍k ê chiap-pāng-jîn kha̍p-thâu sòe-siā !

Keng-choh Han-chû-hn̂g ê Lâng(耕番薯園的人)           

Tù-chiá：Koeh Chìn-sûn  Chhut-pán：2008 Nî 11 ge̍h Hàn-jī-pán

               Chhut-pán-siā：Gio̍k-san-siā

Pe̍h-ōe-jī  Hoan-ek-chiá： Ngô͘ Tong-phek  2018.0113.起筆