Tē-saⁿ. Lâi chiū-kīn Kiù-chú 三．來就近救主
1.Sèng-si Tē 152 (201) siú Kiù-chú thiàⁿ-thàng ê siaⁿ (1828-72)
1.聖詩 第152 (201) 首 救主愛疼的聲
1. Kiù-chú thiàⁿ-thàng ê siaⁿ, góa tio̍h hoaⁿ-hí lâi thiaⁿ,
救主疼痛的聲，我著歡喜來聽；
Lí hō͘ góa lūi, hi-seng lâu-hoeh, kiù góa chōe-jîn sèⁿ-miā.
祢互我累，犧牲流血，救我罪人性命。
(Hù koa) (複歌)
Chú, góa lâi chiū Lí, góa taⁿ chiū-kīn Lí,
主，我來就祢，我今就近祢。
Chiong Lí só͘ lâu ê pó-hoeh, sé góa chōe-ok chheng-khì. A-mén.
將祢所流的寶血 洗我罪惡清氣。（阿們）
2. Kiù-chú thiàⁿ-thàng siaⁿ-im, góa tio̍h khek-tiâu tī sim,
救主疼痛聲音，我著刻住佇心；
Taⁿ góa chōe-chè, siū-teng si̍p-kè, thiàⁿ góa si̍t-chāi chin-chhim. (Hù koa)
擔我罪債，受釘十架，疼我實在真深。(複歌)
3. Kiù-chú kiò góa chin-chêng, góa tio̍h thiaⁿ-thàn bēng-lēng,
救主叫我近前，我著聽趁命令；
Chai góa loan-lio̍k, khoài than su-io̍k, hō͘ góa ē tit chiâⁿ-sèng. (Hù koa)
知我軟弱，快趁私慾，互我會得成聖。(複歌)
4. Kiù-chú kiò góa kéng-séng, góa tio̍h kî-tó bô-thêng,
救主叫我儆醒，我著祈禱無停；
Tio̍h kiâⁿ jîn-ài, siú Chú ê kài, ti̍t-kàu chin-ji̍p thian-têng. (Hù koa)
著行仁愛，守主的誡，直到進入天庭。(複歌)
Tha̍k Sèng-keng Iok-hān it-su 1:5-10
讀聖經 約翰一書1:5-10
1:5 Goán tùi I só͘ thiaⁿ ê ōe, lâi thoân hō͘ lín ê, chiū-sī kóng, Siōng-chú sī kng, tī I choân-
jiân bô àm.
阮對伊所聽个話，來傳互恁个，就是講，上帝是光，佇伊全然無暗。
1:6 Lán nā kóng, ū teh kap I kau-pôe, iā kiâⁿ tī o͘-àm, chiū-sī kóng pe̍h-chha̍t, bô kiâⁿ
chin-si̍t;
咱若講，有咧佮伊交陪，也行佇烏暗，就是講白賊，無行真實；
1:7 to̍k-to̍k lán nā kiâⁿ tī kng-bêng, chhin-chhiō͘ⁿ I tiàm tī kng-bêng, chiū lán saⁿ-kap kau-
pôe, iā I ê Kiáⁿ Iâ-so͘ ê hoeh sóe-tû lán lóng-chóng ê chōe.
獨獨咱若行佇光明，親像伊踮佇光明，就咱相佮交陪，也伊个囝耶穌个
血洗除咱攏總个罪。
1:8 Lán nā kóng bô chōe, chiū-sī phiàn ka-tī, chin-lí iā bô tiàm tī lán.
咱若講無罪，就是騙家己，真理也無踮佇咱。
1:9 Lán nā jīn lán ê chōe, I sī chin-si̍t kong-gī, beh sià-bián lán ê chōe, sé-tû lán lóng-
chóng ê put-gī.
咱若認咱个罪，伊是真實公義，欲赦免咱个罪，洗除咱攏總个不義。
1:10 Lán nā kóng bē bat hoān chōe, piān sī hō͘ I chò kóng pe̍h-chha̍t ê, I ê tō-lí bô tiàm
tī lán.
咱若講未捌犯罪，便是互伊做講白賊个，伊个道理無踮佇咱。
Kiû Chú Ia-so͘ lîn-bín 求主耶穌憐憫
Chú Ia-so͘ Ki-tok, Siōng-chú ê kiáⁿ, kiû LÍ khó-liân góa chit-ê ū chōe ê lâng！
主耶穌基督，上主的囝，求祢可憐我這個有罪个人！
2.Sèng-si Tē 340 (242) siú Chú, kiû LÍ lîn-bín góa (1710-82)
2.聖詩 第340 (242) 首 主，求你憐憫我
1. Chú, kiû Lí lîn-bín góa, tû-khì góa tang chōe-kòa,
主，求祢憐憫我，除去我重罪過，
Sè-kan su-io̍k kā góa tû lī, hō͘ góa lāi-sim chheng-khì.
世間私慾給我除離，互我內心清氣。
2. Chú, kiû Lí lîn-bín góa, kòa-lū ut-chu̍t tîⁿ-pòaⁿ,
主，求祢憐憫我，掛慮鬱啐纏絆，
Hō͘ góa chò Lí chin-tiong lô͘-po̍k, hióng-siū Lí ê khoài-lo̍k.
互我做祢盡忠奴僕，享受祢的快樂。
3. Chú, kiû Lí lîn-bín góa, tiàm tī khó͘-chiàn tiong-kan,
主，求祢憐憫我，tiàm佇苦戰中間，
Khùn-khó͘ iu-būn sui-jiân kīn-óa, sù góa ióng-kiāⁿ pêng-an.
困苦憂悶雖然近倚，賜我勇健平安。
4. Chú, kiû Lí lîn-bín góa, hō͘ góa bián-tit bê-lō͘,
主，求祢憐憫我，互我免得迷路，
O͘-àm tiong-kan lóng-bô i-óa, chhōa góa kiâⁿ thiⁿ lō͘-tô͘.
烏暗中間攏無依倚，導我行天路途。
5. Chú, kiû Lí lîn-bín góa, hong-éng chin-koân hit-sî,
主，求祢憐憫我，風浪真高彼時，
Tùi-te̍k kong-kek hiong-kông pek-óa, kiû Chú tiàm góa sin-piⁿ.
對敵攻擊兇狂逼倚，求主站我身邊。
6. Chú, kiû Lí lîn-bín góa, keng-kòe sí-hô ê sî,
主，求祢憐憫我，經過死河的時，
Éng-oán ê kng hō͘ góa thang khòaⁿ, ū-hūn Lí ê hoaⁿ-hí. A-mén.
永遠的光互我通看，有份祢的歡喜。 阿們。
Tha̍k Sèng-keng Si-phian 51:1-19 Lō͘-ka hok-im 23:39-43
51:1 Siōng-chú ah, chiàu Lí ê chû-ài lîn-bín góa; chiàu Lí hong-sēng ê chû-pi chhat-siau
góa ê kòe-sit;
上主啊，照你个慈愛憐憫我；照你豐盛个慈悲擦消我个過失；
51:2 Chiong góa ê chōe-ok it-chīn sóe-tû, ia̍h sóe-chheng góa, kàu bô chōe.
將我个罪惡一盡洗除，亦洗清我，到無罪。
51:3 In-ūi góa ka-tī chai góa ê kòe-sit; góa ê chōe siông-siông tī góa ê bīn-chêng.
因為我家己知我个過失；我个罪常常佇我个面前。
51:4 Góa só͘ hoān-tio̍h--ê, chiū-sī tek-chōe Lí nā-tiāⁿ, tī Lí ê ba̍k-chiu-chêng kiâⁿ chit-hō
pháiⁿ; tì-kàu Lí kóng-ōe ê sî, hián-bêng chò-gī; phòaⁿ-toàn ê sî, hián-bêng kong-tō.
我所犯著个，就是得罪你爾爾，佇你个目睭前行這號歹；致到你講話ê時，顯
明做義；判斷个時，顯明公道。
51:5 Góa sī tī chōe-ok-tiong seⁿ--ê, tī chōe ê tiong-kan, góa ê lāu-bú hoâi-īn góa.
我是佇罪惡中生个，佇罪个中間，我个老母懷孕我。
51:6 Lí só͘ ài--ê sī sim-lāi sêng-si̍t; tī góa ê pak-lāi, Lí beh hō͘ góa tit-tio̍h tì-hūi.
你所愛个是心內誠實；佇我个腹內，你欲互我得著智慧。
51:7 Kiû Lí ēng gû-chhek-chháu sé góa, góa chiū chheng-khì; kiû Lí sé góa, góa chiū pí
seh khah-pe̍h.
求你用牛膝草洗我，我就清氣；求你洗我，我就比雪卡白。
51:8 Kiû Lí hō͘ góa tit-tio̍h thiaⁿ-kìⁿ hoaⁿ-hí khoài-lo̍k ê siaⁿ; hō͘ Lí só͘ at-chi̍h ê kut thang
hoaⁿ-hí.
求你互我得著聽見歡喜快樂ê聲；互你所遏折个骨通歡喜。
51:9 Kiû Lí ng Lí ê bīn, bô khòaⁿ góa ê chōe, chhat-siau góa it-chhè ê chōe-ok.
求你掩你个面，無看我个罪，擦消我一切个罪惡。
51:10 Siōng-chú ah, kiû Lí kā góa chhòng-chō chheng-khì ê sim, hō͘ góa ê lāi-bīn ū ōaⁿ-
sin chèng-ti̍t ê sîn.
上主啊，求你共我創造清氣个心，互我个內面有換新正直个神。
51:11 M̄-thang kóaⁿ góa, hō͘ góa lī-khui Lí ê bīn; m̄-thang tùi góa siu-hôe Lí sèng ê sîn.
毋通趕我，互我離開你个面；毋通對我收回你聖个神。
51:12 Kiû Lí hō͘ góa iû-goân tit-tio̍h Lí kiù-un ê khoài-lo̍k; sió͘ⁿ-sù góa ū chū-iû ê sîn, lâi
hû-chhî góa.
求你互我猶原得著你救恩个快樂；賞賜我有自由个神，來扶持我。
51:13 Góa chiū chiong Lí ê tō-lō͘ chí-sī ū kòe-sit ê lâng; ū chōe ê lâng chiū beh kui-sūn Lí.
我就將你个道路指示有過失个人；有罪个人就欲歸順你。
51:14 Siōng-chú ah, Lí sī kiù góa ê Siōng-tè, kiû Lí kiù góa thoat-lī thâi-lâng ê chōe; góa ê
chi̍h beh tōa-siaⁿ gîm-si o-ló Lí ê gī.
上主啊，你是救我个上帝，求你救我脫離刣人个罪；我个舌欲大聲吟詩呵咾
你个義。
51:15 Chú ah, kiû Lí khui góa ê chhùi-tûn; góa ê chhùi chiū beh pò-iông Lí ê hó miâ-siaⁿ.
主啊，求你開我ê嘴唇；我ê嘴就beh報揚你ê好名聲。
51:16 In-ūi Lí bô ài chè-mi̍h; nā ài, góa chiū beh hiàn; sio-chè Lí ia̍h bô hoaⁿ-hí.
因為你無愛祭物；若愛，我就欲獻；燒祭你亦無歡喜。
51:17 Siōng-chú só͘ ài ê chè, chiū-sī iu-siong ê sîn; Siōng-tè ah, iu-siong thòng-hóe ê sim,
Lí bô beh khòaⁿ-khin i.
上主所愛个祭，就是憂傷个神；上帝啊，憂傷痛悔个心，你無欲看輕伊。
51:18 Kiû Lí chiàu Lí ê hó ì-sù, hó khoán-thāi Sek-an; khí-chō Iâ-lō͘-sat-léng ê siâⁿ-chhiô͘ⁿ.
求你照你ê好意思，好款待錫安；起造耶路撒冷个城牆。
51:19 Hit-sî Lí beh hoaⁿ-hí gī ê chè, kap sio-chè, í-ki̍p ka-nn̂g-chiah cheng-seⁿ ê sio-chè;
hit-sî lâng beh chiong kang ê gû hiàn tī Lí ê tôaⁿ.
彼時祢欲歡喜義个祭，佮燒祭，以及尻圇脊 精牲个燒祭；彼時人欲將公个
牛獻佇祢个壇。
Lō͘-ka 23:39-43 路加23:39-43
23:39 Siū tiàu-teh ê hoān-lâng chi̍t-ê siat-to̍k I, kóng, Lí kiám m̄ sī Ki-tok mah? Tio̍h kiù ka-
tī kap goán.
受吊咧个犯人一个褻瀆伊，講，你敢毋是基督嘛？著救家己佮阮。
23:40 Tē jī ê ìn lâi chek-pī i, kóng, Lí kì-jiân tâng siū chōe, liân Siōng-tè iā m̄ kiaⁿ mah?
第二個應來責備伊，講，你既然同受罪，連上帝也毋驚嘛？
23:41 Lán siū chōe sī kong-tō; in-ūi lán só͘ siū ê ha̍p tī lán só͘ kiâⁿ; nā-sī chit lâng só͘ kiâⁿ ê,
bô chi̍t hāng m̄ tio̍h.
咱受罪是公道；因為咱所受个合佇咱所行；但是這人所行个，無一項毋著。
23:42 Chiū kóng, Iâ-so͘ ah, lí tī lí ê kok lâi ê sî, tio̍h kì-tit góa.
就講，耶穌啊，你佇你个國來个時，著記得我。
23:43 Iâ-so͘ chiū kā i kóng, Góa si̍t-chāi kā lí kóng, Kin-á-ji̍t lí beh kap góa tī Lo̍k-hn̂g.
耶穌就共伊講，我實在共你講，今仔日你欲佮我佇樂園。
3.Sèng-si Tē 135 (400) siú Kiù-chú goān Lí chò góa bo̍k-chiá (1816-68)
3.聖詩 第135 (400) 首 救主願你做我牧者
1. Kiù-chú goān Lí chò góa bo̍k-chiá, goán lóng óa-khò Lí hû-chhî,
救主，願祢做我牧者，阮攏倚靠祢扶持，
Chhōa kàu chháu-po͘ hō͘ góa lim-chia̍h, pī-pān iô͘ⁿ-tiâu lâi pó-pì.
導到草埔互我飲食，備辦羊廄來保庇。
Kiù-chú Ia-so͘, Kiù-chú Ia-so͘, Lí siok-hôe góa kui-siok Lí.
救主耶穌，救主耶穌，祢贖回我歸屬祢，
Kiù-chú Ia-so͘, Kiù-chú Ia-so͘, Lí siok-hôe góa kui-siok Lí.
救主耶穌，救主耶穌，祢贖回我歸屬祢。
2. Goán taⁿ siok Lí an-ún chū-chāi, Lí beh chhun-chhiú lái pó-hō͘,
阮今屬祢安穩自在，祢欲伸手來保護，
Kiù goán thoat-lī tùi-te̍k hām-hāi, ín-chhōa sit-bê kui chiàⁿ-lō͘.
救阮脫離對敵陷害，引導失迷歸正路。
Kiù-chú Ia-so͘, Kiù-chú Ia-so͘, Lí siok-hôe goán kui-siok Lí.
救主耶穌，救主耶穌，祢贖回阮歸屬祢，
Kiù-chú Ia-so͘, Kiù-chú Ia-so͘, Lí siok-hôe goán kui-siok Lí.
救主耶穌，救主耶穌，祢贖回阮歸屬祢。
3. Goán iau sè-hàn ài chhin-kīn Lí, ài-beh thiaⁿ-thàn Lí bēng-lēng,
阮猶細漢愛親近祢，愛欲聽趁祢命令，
Sim ài pī-pān thang chiap-la̍p Lí, o̍h Lí mô͘-iō͘ⁿ chiâⁿ-chò sèng.
心愛備辦通接納祢，學祢模樣成做聖。
Kiù-chú Ia-so͘, Kiù-chú Ia-so͘, goān Lí thiàⁿ goán kàu éng-oán.
救主耶穌，救主耶穌，願祢疼阮到永遠，
Kiù-chú Ia-so͘, Kiù-chú Ia-so͘, goān Lí thiàⁿ goán kàu éng-oán. A-mén
救主耶穌，救主耶穌，願祢疼阮到永遠。阿們。
Tha̍k Sèng-keng Iok-hān hok-im 10:11-15
讀聖經 約翰福音10:11-15
10:11 Góa chiū-sī hó ê bo̍k-chiá; hó ê bo̍k-chiá ūi-tio̍h iô͘ⁿ pàng-sak sèⁿ-miā.
我就是好的牧者；好的牧者為著羊放拺生命。
10:12 Chò chhiàⁿ-kang ê, m̄ sī chò bo̍k-chiá, iô͘ⁿ iā m̄ sī i ka-tī ê iô͘ⁿ; khòaⁿ-kìⁿ chhâi-lông lâi,
pàng-sak iô͘ⁿ chiū tô-cháu, chhâi-lông kā in, kóaⁿ-sòaⁿ in;
做倩工(chhiàⁿ-kang)的，呣是做牧者，羊也呣是伊家己的羊，看見豺狼來，放拺羊
就逃走；豺狼咬𪜶，趕散𪜶。
10:13 che sī in-ūi i chò chhiàⁿ-kang, bô koan-sim tī iô͘ⁿ.
這是因為伊做倩工，無關心佇羊。
10:14 Góa sī hó ê bo̍k-chiá; góa bat hiah-ê sio̍k góa ê, sio̍k góa ê ia̍h bat góa.
我是好的牧者；我識許個屬我的，屬我的亦識我，
10:15 Chhin-chhiō͘ Pē bat góa, góa bat Pē chi̍t iō͘ⁿ; koh góa ūi-tio̍h iô͘ⁿ pàng-sak sèⁿ-miā.
親像父識我，我識父一樣；閣我為著羊放拺生命。
沒有留言:
張貼留言