"Seⁿ-ji̍t khoài-lo̍k！" khoài-lo̍k mā？！
" 生日快樂！" 快樂嗎？
Kin-á-ji̍t 2022.07.30. sī góa án thiⁿ-ke î-bîn lâi Tâi-oân móa chhit-cha̍p-nî ê ji̍t-chí, thong-siông lán lóng kā chit-ji̍t hō-chò " seⁿ-ji̍t ". Ē khì khèng-chiok he̍k-sī chiok-ho̍k piáu-sī chit-ji̍t sī ta̍t-tit kì-liām ê ji̍t-chí, só͘-í só͘-cha̍p nî chêng khai-sí liù-hêng ta̍k-nî chiok lâng " seⁿ-ji̍t khoài-lo̍k ". Tāi pō͘-hūn ê lâng lóng-sī ēng chia̍h kap sǹg lâi khèng-chiok. Liân tī kàu-hōe lāi mā bô lē-gōa, ē tī móe kó-ge̍h chò-hóe ūi hit kó-ge̍h ê siū-chheⁿ khèng-chiok, siâng-sî iā thak chi̍t-tōaⁿ Sèng-keng hām chò chiok-ho̍k ê kî-tó, m̄-ku mā-sī kā chia̍h kap sńg khòaⁿ koh-khah iàu-kín.
今天2022.07.30.是我從天家移民來台灣滿七十年的日子，通常人們都將這天稱作＂生日＂。會去慶祝或祝賀表示這一天是值得紀念的日子，所以數十年前開始流行每年慶祝某人＂生日快樂＂。大部分的人都是藉著吃喝來慶祝，我們在教會裡也不例外，也會在每個月一起為當月的壽星慶祝，同時也讀一段經文及做祝福的禱告，可是也將吃和喝及玩樂看得更重要。
Tng-sî góa tō kám-kak koài-koài, in-ūi Sèng-keng ê Si-phian 90:10
" Goán it-seng ê nî-ji̍t sī chhit-cha̍p hè, Nā sī ióng-chòng thang kàu poeh-cha̍p hè, Chóng-sī kî-tiong só͘ khoa-kháu--ê, put-kò sī lô-khó͘ iu-chhiû; "
當時我就覺得怪怪的，因為聖經中的詩篇90:10
" 我們一生的年日
Kúi-cha̍p nî-chêng, mā ū lâng kā " seⁿ-ji̍t " ke hō chi̍t-ê bêng-chheng " lāu-bú siū-lân-ji̍t", iā kám-kak put-chí-á ū ì-sù.
Tān-sī tī Thoân-tō-su 12:1 " Lí tio̍h tī siàu-liân ê ji̍t, kì-liām chhòng-chō lí ê Chú, chiū-sī hoān-lān ê ji̍t iáu-bē kàu, iā lí só͘ kóng, Góa bô thang tī i khoài-lo̍k, hiah ê nî iáu-bē kūn ê sî."
Só͘-í, tī seⁿ-ji̍t chit-ji̍t, kàu-hōe sī-m̄-sī tio̍h kàu-tō sìn-tô͘ " Tī Siōng-chú ê ōe-gú tiong kì-liām he̍k-sī hoâi-liām Siōng-chú ê un-hūi.", sui-jiân mā-ū chia̍h ū lim, tān-sī sòa lo̍h--khì thong-kòe jīm-hô chi̍t-chióng oa̍h-tāng á-sī lô-tōng lâi kap Siōng-chú tâng-kang, kám-sī ē koh-khak ū ì-gī.
Góa hō͘ ka-tī ê " Seⁿ-ji̍t lé-bu̍t "
Ti kúi-ji̍t-chêng góa chiah siō͘ⁿ-tio̍h m̄-niā tī chit-ji̍t chiap-siū chi-chhin hó-iú ê chiok-ho̍k, góa ka-tī tī chit-ji̍t tû-liáu kám-siā kap hoâi-liām chó͘-sian ê sin-khó͘ khai-chhòng/ pē-bú ê seⁿ-ióng/ sī-tōa ê khan-sêng, kap Chhòng-chō bān-mi̍h hām sió͘ⁿ-sù oa̍h-miā ê Siōng-chú í-gōa, mā tio̍h ài ū hêng-tōng siōng ê chò-hoat.
Só͘-í, chìn-chêng-ji̍t chiū khì thàm-bōng-chhù(chit-má hō-chò Lâm-san bōng-hn̂g), khì goán ê bōng-hn̂g, chi̍t-ē lâi kàu goán ka-cho̍k ê bōng chêng, chha chi̍t-tiám-á chhōe bô, chi̍t-ē siông-sè chhōe, chiah khòaⁿ-tio̍h i í-keng khì hō͘ cha̍p-chháu khàm-tiâu leh.
Chiū-sī ē-bīn chit-tio͘ⁿ siòng-phìⁿ. Tī nn̄g-ki bōng-pi tiong-ng ê hit-phiàn cha̍p-chháu.
Chêng pòaⁿ-bīn tāi pō͘-hūn lóng-sī Hm̂-á-chháu(茅草) , sió pō͘-hūn sī Kiàn-siàu-chháu(含羞草) .
.jpg)
Góa ka-tī chhōe kha-lō͘, kiâⁿ li̍p-khì kàu bōng-pi chêng, hip ē-bīn chit-tio͘ⁿ siōng. Tī góa āu-bīn, chháu-á hoat kah móa-móa sī, liân pún-lâi ê hit-ki bōng-pi mā khòaⁿ bē tio̍h.
Só͘-í, koat-tēng bîn-á chài-khí, lâi chéng-lí hō͘ khah chheng-khì leh. Ēng á-ne lâi chò góa hō͘ ka-tī ê " seⁿ-ji̍t lé-bu̍t ".
Ē-bīn tio͘ⁿ--- Keng-kòe chi̍t tiám koh sì-cha̍p-gō͘ hun cheng āu ê sêng-kó.
Khiā tī lō͘-piⁿ, i-keng khòaⁿ ē-tio̍h sóa-khì sin-bōng āu-piah, hit-ki goân-lâi ê bōng-pi ah ！Chiū-sī tī hn̄g-hn̄g ê nn̄g phō chhiū-á tiong-ng ê hit-ki sè-kā ki-á ê sì-kak chio̍h-thiāu.
Ē-bīn ê siòng-phìⁿ sī tī 2020 nî hip ê, hām sin bōng, kha-chiah sio-ǹg. Khòaⁿ khí lâi chin chheng-iu, he sī chèng-hú phài-lâng chéng-lí ê, ūi-tio̍h beh tī móe chi̍t ê bōng tah phian-hō, chún-pī ji̍t-āu chhian-sóa só͘-ū ê hûn-bōng thang-ēng.
Hù-tài：
Chit ê Ngô͘-kà lúi-tāi ê bōng-hn̂g sī 1995 nî, iû goán Saⁿ-chek ê hāu-seⁿ Bêng-sûn(銘洵) kái-kiàn ê. I ūi-tio̍h sin-thé beh hoe-ho̍k kiān-khong ê iân-kò͘, chun-chiàu i sìn-hōng ê sîn-bêng ê chí-sī, liân-āu ǹg chhin-lâng pò-kò, chò chi̍t-ê kái-piàn.
1983 nî, khó-lêng chin-chē chham-ka goán a-má Ngô͘-Tio͘ⁿ, Siù-lē( án-kong Ngô͘ Hui ê thài-thài ) ê kò-pia̍t-sek koh ū khì-kàu bōng-hn̂g ê lâng, eng-kai ìn-siōng tiong ê bōng-hn̂g m̄-sī á-ne.
Án-kong tī bōng-pi ê chiàⁿ-chhiú pêng khek " Chiau-hô cha̍p-la̍k nî " chiū-sī 1941 nî, hit tang i sì-cha̍p-chhit hòe ê sî, chiàu Ji̍t-pún lâng ê hong-keh khí-chō Ngô͘-kà ê bōng-hn̂g , m̄-sī Tiong-kok-sit ê.
Án-kong hit-sî í-keng tam-jīm Tâi-lâm chiu-thiaⁿ ê kòe-kè chú-jīm, 1937 nî Ji̍t-pún chèng-hú í-keng tī Tâi-oân thui-tián " Hông-bîn-hòa ūn-tōng ", i chiū chú-tōng chham-ú, pau-koa tī chhù-lāi mā kóng Ji̍t-pún-ōe, chhēng Ji̍t-pún hô-ho̍k, mā kā sèⁿ-miâ, Ngô͘ kái chò Ji̍t-pún sèⁿ, hō-chò "Kong pún". I chhù lāi ê lâng choân-pō͘ kái chò " Kong pún", ū ê liân miâ mā kái kòe.
1983-nî in-ūi A-má ê chòng-sek, Jī-chek hām Sì-chek chiong bōng-hn̂g chéng-siu koh-khah bí-koan, pau-koa chéng chi̍t-châng Siông-chhiū hām chéng chi̍t-phiàn ê Hân-kok-chháu, iā kau-tāi góa ài tàu khòaⁿ leh, tān-sī góa hit-chūn tòa tī Pîn-tong, āu-lâi poaⁿ-khì Chiong-hòa, 1987 nî sui-jiân í-keng tńg-lâi tòa Tâi-lâm, mā-sī bô-êng chia, bô-êng hia, bô khì chiàu-kò͘, ka-chài chóng-sǹg ū chit-ê ki-hōe lâi piáu-ta̍t góa ê hoâi-liām, kap chhut sió-khóa la̍t lâi chéng-lí.
koh hù-tài：
Ē-bīn sī Án-kong Ji̍t-pún sî-tāi ê hō͘-kháu chu-liāu, nā ū chhin-iú siō͘ⁿ-beh chai-iáⁿ koh khah chē chu-liāu, chhiáⁿ chah ka-tī ê sin-hūn-chèng khì ta̍k-ūi ê Hō͘-chèng sū-bū-só͘, ǹg keng-pān ê, kóng "Chhiáⁿ lí thè góa ìn goán a-kong (he̍k-sī gōa-kong ) Ngô͘ Hui Ji̍t-pún sî-tāi choân-hō͘ ê hō͘-che̍k chu-liāu, sī ēng mô͘-pit siá ê."
chiū-sī
Ē-bīn ê siòng-phìⁿ chiah-sī mô͘-pit siá ê. Che chiah-sī goân-pán ê chu-liāu. Góa tē-it páiⁿ khì sin-chhéng ê sî, in sī ìn kńg-pit siá ê hō͘ góa, pêng-iú khóaⁿ-liáu kā góa kóng, che m̄-sī goân-pán, koh ke cháu chi̍t-chōa, chiah tit-tio̍h goân-sí chu-liāu.
.jpg)
Téng-bīn 2022.07.29. Châ-khòaⁿ bōng-hn̂g chi it. 上圖2022.07.29. 查看墓園 之一
Châ-khòaⁿ bōng-hn̂g chi jī, 22.07.29. 查看墓園 之二
Chéng-lí 20 hun-cheng āu, lâi kàu sin ê bōng-chêng, che-sī 1995 nî kái-kiàn ê bōng kap bōng-pâi.
Chéng-lí kàu-chia, ē-tàng khòaⁿ-tio̍h bōng-pi ê saⁿ bīn. Chiàⁿ-bīn iau to̍h koh hē kang-hu.
Chóng-sǹg ē-thang khiā tī án-kong só͘ chhāi ê bōng-pi chêng.
Ǹg-bāng ū chi̍t-ji̍t ē-tàng kā hoe-ho̍k goân-chōng.
Chhiūⁿ ē-bīn ê siòng-phìⁿ tī keh-piah koh keh-piah hit-ê bōng-hn̂g ê khoán, sī Ji̍t-pún-sit koh ke chi̍t-tiám-á Tâi-oân-bī( ū chò āu-chhiûⁿ koh sio͘ⁿ jī ), khòaⁿ-tio̍h khah bí-koan, iu-ngá, chheng-sóng.
Tī 2020 nî hip ê
